Атамекен-Агро және CLAAS connect: үлкен деректер техниканы басқаруды қалай өзгертеді
«Атамекен-Агро» АҚ бас инженері Александр Понамарев El Dala, басылымына сұхбат беріп, холдинг техникасын CLAAS connect цифрлық экожүйесіне қосу жобасы туралы айтып берді.
«Біздің холдинг әртүрлі аудандарда ғана емес, әртүрлі облыстарда орналасқан өсімдік шаруашылығымен айналысатын 10 шаруашылықты біріктіреді. Егістік жердің жалпы көлемі 333 мың гектардан асады. Негізінен нөлдік технология бойынша 14 түрлі дақыл өсіреміз. Сатып алынатын техника қымбат. Мұның барлығын қағаз жүзінде есепке алып, цифрлық технологиялардың көмегінсіз бақылауда ұстау мүмкін емес».
2020 жылы «Атамекен-Агро» үлкен деректерді жинақтау, талдау және басқару үшін CLAAS TELEMATICS лицензиясы бар жаңа XERION тракторларын сатып алды. Бұл компанияның цифрлық тарихындағы жаңа кезеңнің бастамасы болды. Пилоттық жоба Қазақстандағы CLAAS техникасының ресми дилері CT AGRO компаниясымен бірлесіп іске асырылды.
Компанияның бас инженері атап өткендей, алғашқы кезеңнің өзінде CLAAS TELEMATICS техниканың негізгі жұмыс параметрлерін бақылауға мүмкіндік берді. Олардың қатарында қозғалтқыш жүктемесі, геолокация, мото-сағаттар, бос тұрып қалу уақыты және отын шығыны бар.
2024 жылы Қазақстанда CLAAS connect жүйесі іске қосылғаннан кейін цифрлық мониторинг мүмкіндіктері айтарлықтай кеңейді. Мобильді қосымша арқылы мамандар машиналардың жай-күйі туралы ғана емес, олардың атқарған жұмысы, өнімділігі және пайдалану тиімділігі туралы деректерге де жедел қол жеткізе алды. Сонымен қатар, алдағы техникалық қызмет көрсету туралы хабарлама жүйесі бапталды. Бұл сервистік жұмыстарды уақытылы жоспарлауға және техниканы пайдалану сенімділігін арттыруға мүмкіндік береді.
CLAAS connect іске қосылғаннан кейін күтпеген жөндеулер саны қысқарды. Маусымдық мониторинг қорытындысы бойынша мамандар жекелеген машиналардың істен шығу тәуекелдерін алдын ала анықтап, келесі маусым басталғанға дейін қажетті шараларды қабылдай алады. Маусымаралық кезеңде тораптарды бөлшектеу және тексеру ықтимал ақауларды уақытылы жоюға және дала жұмыстары кезінде техниканың бос тұрып қалуының алдын алуға көмектеседі. Нәтижесінде техниканың күтпеген істен шығу жағдайлары 3–5%-ға азайды.
2025 жылы АҚ машина-трактор паркін TRION астық жинайтын комбайндарымен және JAGUAR жемшөп жинайтын комбайндарымен толықтырды. Егін жинау кезеңінде техника өнімділік пен сапалық көрсеткіштерді егістік карталарына байланыстыра отырып тіркейді. Бұл «Атамекен-Агроға» әрбір учаске бойынша нақтырақ талдау жүргізуге мүмкіндік береді.
CEMOS AUTOMATIC борттық ассистентімен жабдықталған астық жинайтын комбайндардың маңызы ерекше. Жүйе бастыру процесін оңтайландыруға көмектеседі: мамандар қандай дақыл жиналып жатқанын, қандай саңылаулар қолданылып жатқанын, шығындардың қай жерде пайда болатынын көріп, жинау тиімділігін арттыру үшін техниканың баптауларын уақытылы түзете алады.
«Атамекен-Агро» техникасының бір бөлігі жаңа CEMIS 1200 борттық терминалымен жабдықталған. Мұндай машиналар тапсырма карталарын қашықтан, тікелей борттық компьютерге алады.
Александр Понамаревтің айтуынша, техника жүрісінен бастап бірлік аумақтан алынатын құрғақ зат шығымына дейінгі деректер жинақталған сайын, «Атамекен-Агро» өндірістік процестерді одан әрі нақты жоспарлай алады. Болашақта бұл компанияға өнім сапасы мен көлемін арттыра отырып, өндірістік шығындарды төмендетуге мүмкіндік береді.
